2010年7月21日星期三

SOB 個南非, 世界杯之旅 3

上次提到,食完飯我地就出左去石灘影相。

下一站當然係酒店啦,酒店呢一Part都要講講,基本上成間酒店都係Sony Book唒,出入的人九成都係黎自不同國家的Sony的員工,每人都有一個Pass,係酒店範圍都要掛住係心口,隨時都有Security Check我地個Pass,去到邊都有實Q,由個一刻,我地就冇擔心過安全問題,肥星都可以著少條褲,唔洗再驚有人會爆入房。

Check-in前黎左個Briefing,Briefing的地點係酒店入面一間Conference Rm,呢間房最特別的地方就係有波睇,仲有野食,房間裡面提供各式各樣飲品及小食,包括酒精飲品,營業時間係早上8點到晚上8點,即係話我地隨時隨地落黎都有野食! 大家都知道架啦,我最關心就係呢樣野! 我地就一路食一路聽住Briefing,內容大致講下我地聽日睇波要注意的咩,係酒店要掛Pass等等,及後仲每人送左一份神秘禮物,係咩黎? 今晚就會公佈!

安頓好的行李,好快就要出去,我地去左酒店旁邊一個商場,叫waterfront,環境係點? 睇下相先。


聽到有一位團友話好似意大利威尼斯,我冇去過,唔知係咪真係似,不過知道開普敦係俾英國荷蘭等歐洲國家統治過,建築物普遍都有歐洲特色,環境真係好靚,就算唔係有世界杯,呢個地方都係好值得黎。

成個海港周圍都見到呢種雀
跟得團都知道,導遊一定會帶你去買下好野,今次就帶我地去買讚石

當然,我地咁高消費力,莫講話買,真係聽都冇聽就走開左,最抵死就係間舗入面都有波睇,我地就成班人入左去睇巴西對荷蘭,情況就係咁。

鏡頭下有8位團友,鏡頭另一邊就有5位,即係我地一團16人,有13位坐左係度睇波,好彩,仲有一位團友有興趣,俾3個Salas姐姐圍住,旁邊仲有兩位領隊陪佢,睇左好耐,不過最後都好似買唔成,如果呢團係內地個隻80蚊香港兩日遊,我地乜都唔買,應該會同導遊係門口玩真人版Street Fighter。


離開商場後就係自由時間,我地就急急腳咁搵地方睇波,領隊話犞另一邊有大電視直播,我地當然要過去感受下!
就係呢度啦,我地就係到睇到巴西點輸,由於周圍有幾十種不同的人種,個個都講o的我地聽唔明Ge話,我地當然用我地最地道睇波方式用融入呢個環境啦,即係點? 咪就係一有埋門呀,入波呀,緊張關頭就「妖」兩聲lor! Actually ,其實都唔止兩聲,直頭所有爸爸媽媽都出哂黎,因為我地全部人都係捧巴西的,下半場無端端咁俾人入兩球真係,可以想像到當時粗口真係滿天飛,加上附近有成千上萬個vuvuzela係度vu,成個環境真係嘈到拆天! 肥星直頭慶到想衝去踢爛個電視! 當然最後冇做到,只係賽後電視台訪問荷蘭球迷個時攪下破壞! 係個camera面前揮手跳舞,如果有朋友係荷蘭電視台見到我地的話,麻煩單聲,我想睇返!
我地就好辛苦咁搵到個位攝,其實呢度實際係得3個位,不過就容納左我地6個人。
大家都知巴西輸左,完場後,有一大班阿根廷迷係度唱歌跳舞慶祝,我都入左去一齊跳,因為我係支持阿根廷的,個個都攬頭攬頸,不過...清一色男粉絲,跳左一陣就走左。

待續



1 則留言: