(參賽BLOG) LOVE LOVE LOVE~~

我嘅American Dream trip目的地係位於費城嘅LOVE Park

因為, 我最想做嘅係同呢個LOVE雕塑黎一個合照!!

呢個love同我之間有乜意義?  

喺……好耐好耐之前~~~~~~~

2008年4月3日

我同一班中小學朋友, 第一次出埠去旅行. 

目的地係台灣

七天行程入面, 我哋朝見口, 晚見面. 每個人之間嘅互動令我哋漸漸產生左微妙嘅變化.

一齊玩, 一齊沖涼, 一齊瞓覺.

原來…..我哋可以咁夾, 咁緊密架 !  

當我哋眾志成城嘅時候, 根本係無野可以難到我哋!!!!!

Yes ! 呢個就係我哋想要嘅野~~  

而旅程入面, 最令到我哋體會到大家果種一呼百應, 義無反顧嘅時間就係影呢輯相果陣.

當日, 我哋一見到呢個 LOVE 嘅時候, 就好似蜜蜂見到蜜糖一樣, high 翻天~~~~~~

玩得不亦樂乎.

想當年, 邊有人會影呢類跳相丫, 創意就喺一班人走埋一齊嘅時候撞出黎.

台北101呢個LOVE可以話喺我哋旅程入面畫上左一個完美嘅句號.

即使旅程完結, 我哋都仲整左段片去紀錄呢次嘅經歷.

睇得出, 我哋係幾咁鐘意呢個 LOVE 雕塑.

同時間, 由果陣開始, 我哋每次去旅行時都會收集當地跳相去儲存我哋嘅旅程.

位於東京嘅LOVE當然都走唔甩!!

入黎望下, 幾開心嘅 !!

既然我哋之間嘅默契已被呢個台灣之旅引爆, 就要好好俾佢繼續燃燒. 呢個力量, 就係我哋專屬嘅Boys Love, 每個人都能夠互相欣賞之餘, 亦明白大家嘅長短處. 你有嘅係創意, 我有嘅係執行力, 互補長短, 創造出 sobplayer 嘅初型.

Sobplayer 一路走來, 我哋之間已經發生左無數咁多件事, 幾年之間所見識到嘅野, 去過嘅地方亦都唔少, 一切一切嘅事情都源自當日呢個旅程入面所產生嘅情懷, 呢段日子實在係鑊鑊精彩鑊鑊甘. 當然, 我哋並未有停下來嘅打算, 反而希望繼續將我哋呢種生活態度延續, 喺度為大家分享

而最近又有幸撞見呢個My American Drem trip 嘅活動, 第一時間, 我就諗起要襯呢個機會, 親身去見識對我哋意義深重嘅呢個 LOVE 位於 Love Park 嘅始祖, 好好紀念Sobplayer 嘅 Boys Love 當日喺台灣大爆炸. 

雕塑設計者(Robert Indiana), 佢最初都可能未有預計自己嘅作品可以有如此影響力, 能夠將佢自己獨有嘅LOVE 散佈到全世界, 呢個愛.......真係好犀利 !!!!



去費城LOVE PARK, 再影一次跳相, 就係我嘅 American Dream trip.

待續 !!!

呃呃like(roadshow) 03_05_2013

偶然上網遊走嘅時候, 見到一篇文章教人點樣喺Facebook…….呃like.

用得 呃 呢個字, 好明顯就一定係篇抽水文啦, 話就話教你, 同時亦都笑鬼你, 內容好鬼過癮. 但老實講句, 我真心認為 (為何人們喜歡在facebook 呃like) 可以出一篇論文.

入題!

呃like, 人人都明, 咁咩叫呃呃like?

呃呃like 其實係一個遊戲, 一個可以俾你同朋友喺日常生活期間, 增進感情嘅互動遊戲!! 我要正式喺到向大家強烈推薦.


遊戲步驟好簡單:
1.      趁你朋友不知不覺嘅時候, 將佢嘅電話暫時移離視線.
2.      用電話幫佢update facebook status, 如情況許可, 請搭番張頂癮照片
3.      如情況依然許可, 幫佢like自己個 status
4.      如情況都仲許可, 幫佢回覆朋友嘅留言
5.      如情況咁都仲依然許可, 都唔好玩勒, 你朋友已受到應有教訓, 搵機會不動聲色咁放番個電話去佢身邊. 如果可以做到呢一步, 呢次已經係一個perfect hit.


扯! 未即係玩人facebook~~~   講咁多, 有乜野好玩?


當你身邊位朋友, 可以為你創作類似句子時, 事情會唔會變得更得意?

(status::我性陳，我身痕，我鐘意女人喉禽)

like係唔使呃嘅, 佢會好自然咁湧埋黎



呢個遊戲, 我已經唔記得左係點樣開始, 但好肯定呢種騎劫別人facebook嘅做法, 最初都大約係講吓類似嘅說話.

(status::我是on 99的人)

慢慢, 大家會因應機主嘅際遇去設計status…好貼心

(status::2013年啦！我要拍拖呀！我真係仲未忘記...好辛苦呀...)

剛失戀既人

(status::如果我有頭髮，我一定溝死女！)

Skin head 嘅單身男人




最後, player之間嘅創意真係令人好無言

完全亂黎



呢種橫衝直撞嘅status令到玩人facebook都變得不再簡單乏味, 而呢個亦係點解我要
推薦大家試下玩呃呃like!! 因為我哋呢到專門為你介紹任何開心嘅事情~~


自從呢個活動喺我地player之間嘅圈子興起之後, 呢件事所帶動嘅歡樂, 估唔到並唔止於我哋幾個人, 就連平時比較少聯絡嘅facebook朋友一樣會投入左件事入面. 喺開始嘅時候, 可能只係身邊較密切嘅朋友會留意到並留言搭兩句嗲, 但當呢類戰鬥去到百熱化嘅時候...

(status::我很醜，但很持久)

有朋友會inbox問你, 真係想拍拖? 係咪要介紹女仔俾你識呀?
有朋友會係status回, 無用! 又輸! 你又俾人拎左個電話勒!!





喺現實世界, 更加有朋友會直接問你戰友, 佢呢陣子無事丫嘛? 我見佢嘅facebook status咁怪嘅~


不其然間, facebook入面部份似有還無嘅朋友, 因突然間嘅交流, 令關係都變得實在左!! 真係不得了~~


再者, 因為呢個遊戲係全天候進行, 無特定嘅開始時間, 只有終結時間(無電), 果種一個眼神就大家明白發生緊乜事嘅交流, 真係叫人讚嘆.....你望一望張枱, 我就識係枱底接收個電話; 你努力update緊相片時, 佢自動走去同物主搵水吹, 拖延時間. 即使行動失敗, 都夠大家開懷大笑一番, 每個片段都係令相處過程變得更熱鬧嘅原因.


聽我講完, 有無個好心急想玩嘅衝動? 有目標未? 如果你已經諗到幾位幸運兒, 恭喜你! 你身邊仲有佢哋, 佢哋一定係你身邊最close, 最玩得嘅朋友~~

(status::只要有愛，夢可成真。我信，你地信唔信呀？)

最後, 我想講句...Facebook like呢樣野真係個好鬼異嘅發明, 即使果個係被騎劫status, 我一樣會check住個 like….激氣, 真係爭唔落(大力拍枱)!!!


PS 為令遊戲公平, 兩大原則要守.
1. 不能用密碼lock機, 就算要lock, 都要係一個公開密碼.
2. 被騎之Status 不能刪除.


各位, enjoy~

毒有之Boys Love PROJECT: 即LOVE即有 (road show) 26_04_13

上一篇網誌入面講左少少sobplayer點解咁鐘意玩嘅原因, 仲提到參加比賽就係我哋嘅專長. 其實我哋口中嘅玩又點止參加比賽咁簡單丫, 仲係絕對多元化同生活化! 慢慢, 我哋會喺到一一呈上!! 

呢次, 我哋要將自家製既玩味帶入旺角西洋菜南街行人專用區

留意熱奶手上個LOVE字樣, 見唔見特別之處?

 對比下面.

佢手上個O字係斜左去另一個方向架!! 

今次咁做其實係有喻意嘅, 因為將會出現係Project嘅Love, 並唔係一般嘅Love, 係我地之間毒有嘅Boys Love

Project: 即LOVE即有

講咁耐即係玩乜呢? 大家都知西洋菜南街自從有左行人專用區時段後, 喺呢10年入面不斷咁轉變.

易拉架 街霸 百佬匯 o靚模 相佬 政治show 法輪功 仲有一架--警車

如果問呢陣子最hit係乜, 除左內地黎果批奇人異士之外, 最紅一定係擺檔幫人影即影即有呢件事.

我並無深入去探究呢個風潮從何而來, 整個概念背後個特別意義, 只係有日行過, 嚇見條街原來已經有4檔同時做緊!! 成條行人專用區, 7仔加埋OK都好似無4間, 呢件事真係好有話題性, 忽發奇想, 不如幫同佢地黎個小比拼吧~~

要做比較, 首先緊係喺每個攤檔都影番張啦, 但我地呢次個著眼點除左張相靚唔靚外, 都想睇下攝影師個創作力同埋佢跟客人之間個互動可以去到邊(簡單講, Is he 吹able & 玩able?). 正如我哋玩比賽一樣, 除左獎品外, 件事係未夠得意, 玩嘅過程, 最後領獎方法同待遇我地都會在意, 下下只係睇結果, 一定傷心死,

講番呢次點玩法. 係每個攤檔, 我哋都會講番類似下面嘅說話:

攝影師, 我地攪緊個project, 關於Boys Love嘅, 想你幫我地影出呢種感覺. 眼前呢兩位就係你嘅model, 可以隨便舞佢地, 幫佢哋擺post架~~  

聽完後, 幾位攝影師都對Boys Love呢樣野好有疑問, 哈! 我地再解說:

其實呢, 我地所講個Boys Love唔等於gay嘅, 無性愛係入面. 呢種Boys Love係….好比兄弟咁親, 又唔只老友咁簡單, 中間係有互相欣賞同支持, 甚至有一種超越友誼嘅傾慕同情懷喺裡面.

一段咁虛無嘅解說, 跟躆我哋經驗, 係絕對足夠引起任何人想吹水嘅意興(如果佢喜歡的話). 攝影師喺期間俾出黎嘅反應, 某程度上都睇到佢係未鐘意同客人溝通吹水. 而整個介紹入面我哋係無講呢個即LOVE即有嘅project, 因為我哋希望佢會保持番平常心, 當我哋普通客人去對待.

好, 入題勒!!!! 

講明先呀, 呢次話就話係比拼, 但我地純粹玩下炸, 各攝影師嘅一眾支持者唔好太認真.

即LOVE即有

日期21.04.2013

時間 15: 30  

每檔一張即影即有, 都係消費廿蚊

下面係按時序排列

1. instant20
Player: 軟人 小白

排隊時間: >30min人龍有時會似大時大節排隊買戲飛咁長

外表上面呢位攝影師係最有藝術家感覺嘅一位, 年紀應該同我哋差唔多掛, 笑容充足! 傾落, 發覺佢都好隨和, 好人黎嘅.

過程入面, 印象最深刻係佢講左句大約意思話張相影唔影到個Boys Love嘅效果, 係睇個model俾唔俾到種感覺....又真係好有道理.
當然, 佢跟住都有俾個動作概念我哋, 幫我哋完成左張作品.

有一樣客觀事實可以特別讚番instant20, 就係佢哋入住張相個框框.

睇得出係擺左心機, 完全跑出.

2. Monocam

Player: 傻輝 黎生

排隊時間: ~10min

呢位攝影師感覺比較沉實, 但並唔代表佢唔肯講野.

反而, 佢個指導性都好強. 喺指引傻生擺post嘅時候, 好肯俾意見, 甚至自己示範埋出黎, 都係一個玩得嘅人.

攝影師覺得黎生伸脷係一個selling point.....我真係諗唔通~

不過有樣野佢哋真係比下去....

只係用一個膠袋入住張相俾客

3. MEMO photo
Player: 小白 黎生

排隊時間: ~2min
最嫰口嘅靚仔攝影師, 似係仲讀緊中學嘅學生. 佢喺聽完我哋個Boys Love簡介之後, 甚至流露出一絲尷尬嘅表情, 好好笑, 而且得意~ 但亦因為咁, 靚仔過player既任何男士, 我唔打算俾佢個樣出現喺blog.

個Love牌擋住左一個好精境嘅地方, 個靚仔攝影師係叫我地 '橋' 腳架!! 哈哈

佢都有個相框俾客人入住張相

其實係可以印多少少資料/得意野嘅

離開時, 攤檔嘅朋友亦會好開心咁叫我哋上番facebook page支持, 感覺好青春同校園
仲有, 佢哋係我眼見唯一寫住有彩色相紙選擇嘅一檔(有錯勿插), 同埋每日頭5位(唔confirm個數字)影相嘅朋友會有紀念品送, 好有做project feel~




4. Quarter photo
Player: 奶 星

排隊時間: 剛開檔, 唔使排.
年紀最大, 感覺最成熟嘅一位攝影師.

一聽完我哋個Boys Love簡介之後, 行兩步, r左幾下頭.......就好似有個燈泡出現咁, 佢提意呢個動作...

好old school, 但襯佢 !
老實講, 我哋開頭都唔明佢指係邊個動作, 但當清楚後, 攝影師都唔使點指引, 我哋就自動波將星同奶玩個不亦樂乎, 因為呢個POST要兩個男人擺, 好好笑

見唔到奶個樣, 好可惜

呢個係入住相個膠袋

多條膠紙, 叫做贏左Monocam少少少

可能係件事太好笑, 或者剛剛開檔嘅關係, 呢位攝影師撻左一下q, 所以呢張作品其實係唯一一張要take two嘅, 佢好似話個曝光仲差少少. 當然, 佢係自己主動要求再影, 所以只係收左一次廿蚊~

前後玩左個零鐘, 4位攝影師, 各有唔同感覺, 都幾好玩. 

講真, 要做比較的話, 仲可以有好多範疇, 好似助手, 相紙, 器材, 燈光, 背景等等.....

始終我哋口中嘅比較都係玩票性質, 如果大家有留意, 我哋對一眾攝影師都無乜做任何批評, 佢哋都係付出緊自己心機時間去做喜歡嘅事, 應該係得到鼓勵. 至於張相係未合心水, 留俾大家分析. 反而想講係喺每次影相過程入面, 一眾攝影師都願意去聽我地所講嘅概念去俾意見, 無黑面, 交流都係做到嘅, 只係多與少嘅分別. 呢個互相溝通嘅過程, 我覺得隨時係取決張相影得好唔好嘅關鍵, 可能比部相機型號更重要.

影相, 本身就係一件開心嘅事, 黑白即影即有, 我覺得係更加令每張相都多一種故事性, 呢樣野正正係點解我會認為即影即有比衣家尖東海旁嘅即print即有, 又或以前嘅貼紙相機更講求感覺. 最終, 旺角行人專用區呢個攝影服務, 會唔會淪為另一個尖東海旁, 我覺得除左要睇攝影師嘅態度之外, 每一個影相嘅你點睇呢件事都好緊要.

廿蚊係一個價錢, 張相係一個價值, 絕對唔係張張都((到數))的.

話又說回來, 我哋之間嘅Boys Love並唔係咁易補捉. 咁多年來, 唔同project之間影過無數咁多相, 下面呢張一定係最有feel 嘅!!

非你兩個莫屬, 星軟人(攝於2011年聖誕冰場, 星軟塵)

最後, 如果讀者有興趣的話, 歡迎黎到我哋個專頁睇下呢4張Boys Love嘅受歡迎程度, 又或者自己都投吓票, 亦得! 話你知, 文章見街呢日, instant20暫時領先~~

我係snake eys

呢次係UA cinemas攪既, 睇 (義勇群英: 毒蛇反擊戰) IMAX 3D嬴巨獎.

贏左的話, 個獎品好堅秋, 雙人美國拉斯維加斯7日6夜 義勇群英：毒蛇反擊戰 typeface 冒險之旅.

個行程最勁係呢個: 學習日本武士必殺技!
會唔會係時間停止呢?, 聽到已經流晒口水~

活動入面須要做既係影低兩張imax3d版既戲飛, 然後係番 imax戲院打咭, 並且寫低點解睇 (義勇群英: 毒蛇反擊戰) 一定要睇 imax 3d 版, 講得最好就會有獎

講真, 點解要睇 imax3d 版本, 我相信來來去去都係果幾樣架勒, 未又係大銀幕, 更立體之類既原因, 都好難有咩突破.

跟住, 同奶吹水期間, 佢俾左個好無里頭既意見, 佢話

William Yip 原因去睇: 因為要睇返自己既演出!

我真心覺得..無里頭到極點, 無啦啦, 演乜野出呢~~~

隔多日, 再睇下呢套戲既少少資料..........我諗到勒 !!!  一於係奶既概念上再加個更精準既切入位, 就係將自己代入做戲裡面既 snake eyes!!!!

有睇套戲既你都會知, snake eyes係入面完全無露過面, 我話自己係snake eyes呢樣野都無話一定唔得姐, 嘩haha ~~~

就咁啦!!  買多把膠刀仔, 全情投入去扮埋snake eyes影相..

真係好奇怪, snake eyes著牛仔褲

上面就係, 用左大約10min 完成既作品

最後作多幾隻字~~
 一齊黎欣賞下我地交俾大會既野~

呢份參賽作品, 幾好, 唔錯 !!
老土既野, 有~
幽默既野, 有~

係email 入面, 我地繼續堅持到底 !!

Hi,

唔知你地指既screen cap 係未我呢兩張相，如果有問題，可以打俾我的。
張飛尾，我仲keep住，如果要睇清楚張 tickets ， 我可以另外再send。

snake eyes, 948xxxxx

成件事俾我既感覺, 就好似當年雷神果穫~~

又係英雄人物, 又係扮野, 又係勁快手, 又係去美國........今次仲要幪埋塊面 !!

一齊睇下呢隻snake eyes 係未可以笑到尾~~

不是一時貪玩(road show) 19_04_13

話晒今日第一次喺到揸筆, 我覺得係要做少少自我介紹嘅.
關於sobplayer我會咁形容: 一班自問好貪玩既人, 命中注定要走埋一齊嘅遊戲團隊.

呢個社會貪玩嘅人你同我身邊都會有, 咁我哋又何得何能可以喺到有個地方同你分享自己嘅玩樂誌呢?
因為我地-----認真地, 不停地, 有意義地, 不是一時貪玩.

好! 開始勒, 呢個星期先講下我哋最叻果範!!
上網睇報紙雜誌時一定見過唔同品牌喺推出產品服務果陣攪嘅推廣, 呢類活動當中, 以作品徵集比賽, 或者攪抽獎係最普遍既做法, 你有無參加過？有無人會覺得呢類活動係黑箱作業呢？

抽獎呢個範疇我地經驗少, 唔評論, 不過喺參加比賽嘅方面, 我哋就有唔少經驗！

輝煌嘅戰績--有

黑箱到一肚氣嘅結果--有

喺呢個比賽嘅領域，我用專才去形容sobplayer係絕對唔會過份.


你問我地點解會不停去參加呢類活動？
憑住我地無聊事認真玩住地做嘅態度, 過程入面每每都充滿驚喜. 我真係諗唔到要停嘅原因.
先唔講贏左比賽之後嘅獎品(電視，相機，電話，旅行，現金....)

每次我哋走埋一齊去做一件事嘅時候都一定充滿歡樂, 當中發生嘅一切經歷, 點點滴滴都係將我哋份友誼維繫住嘅原素. 其實呢種感覺就似求學階段, 柴娃娃去為學會, 或者社際活動投入熱情嘅感覺一樣.

老實講, 離開學校後, 一班老友依然可以出心出力去為一件事努力, 唔係為交功課做project, 更加唔係為什麼有利可圖嘅大生意, 即使最終攪咗鑊粥出黎, 亦無乜所謂. 因為成件事, 我地最想得到嘅係朋友之間相處時最直接嘅快樂.

blog獨有, 送嘅兩點

我地一定賺玩。

除咗話賺玩,有時都會諗我哋嘅香港太少得意事發生勒, 既然我哋喺玩呢方面有少少過人之處,而又難得地揾到個空間去發揮自己, 真係唔應該浪費, 我哋好應該繼續去玩, 繼續將自己嘅生活態度展現出黎, 希望大家可以喺我哋身上找到一點什麼，那怕只係一次發笑嘅機會, 都已經係令我哋嘅付出再帶多點價值.