我哋嘅大時大節 (roadshow) 20_05_2013

剛剛, 多得佛誕, 我哋放左一個LONG WEEKEND, 而因為呢個LONG WEEKEND, 相信長洲入面有批朋友, 應該都好開心~~

講緊乜? 就係長洲入面嘅商戶.

星期五佛誕呢日, 就係一年一度嘅太平清醮, 新聞報導除左一如以往講左長洲入面人山人海個狀況之外, 跟手再講埋入面嘅商戶點樣好有諗頭咁繼平安豆袋之後, 再獻新猷, 設計左平安龜, 平安貓同平安.....BB襪 !! 相信佢哋都應該幾好生意, 真係替佢哋開心~


話說回來, 幾年前我哋都去過一次太平清醮, 我覺得果一次嘅經驗其實係辛苦...唔抵玩.

飄色巡遊? 我只係離遠聽到鈴鈴鐺鐺嘅音樂聲, 無嘗試係烈日當空下迫入人流 !!

包山? 我算影到....

合照~~

最接近關於太平清醮嘅時間就係迫左係碼頭對出條大街欣賞平安包嘅相關產品~~



如果要數果日影到最開心嘅場景, 係咁嘅

果日真係乜文化野都睇唔到, 以後都唔會再揀呢日去長洲. 對我黎講, 呢日只係比平時多左個平安市集.

長洲本身係夠好玩架勒, 平時去先係明智之舉~~




好, 樓上嘅都係題外話!! 入正題

關於香港嘅節日活動, 一路以來最能夠吸引旅客, 而政府又肯大力宣傳嘅應該都係端午嘅龍舟比賽, 樓上講嘅太平清醮, 新年花車巡遊等等.....有無漏?? 丫! 仲有n咁多次嘅煙花表演.


呢類活動呢..... 唔係話唔好玩!! 不過.....你有無留意到一個好大嘅共通點..

開估前, 俾幾個其他城市嘅節慶活動大家參考比較下先..


西斑牙 蕃茄大戰
http://www.youtube.com/watch?v=QPQCH1b_LgE

Thailand 潑水節
http://www.youtube.com/watch?v=vM_ddQBLHf0


San Francisco easter
http://www.youtube.com/watch?v=cO9DYLsDVk8


估唔估到香港嘅活動同以上舉例嘅有乜最大分別?



開估!



我講嘅係參與度, 原來我哋有好多節慶入面嘅慶祝, 做市民嘅真係得個睇字, 好難即時參與其中. 我無可能見到龍舟上面嘅健兒玩得好開心嘅時候, 就去搵隻龍舟黎玩, 又或者覺得個包山好過癮, 就走去爬~~

我哋香港嘅節慶活動入面, 結構同我另外所舉例, 外國嘅節日真係好唔同, 最少我哋真係好缺乏呢個種類.....點解呢? 定一話我真係遺忘左??

香港有無可能發展到一兩個類似嘅活動可以俾人更容易參與呀?

我哋嘅節真日需要多一點生氣~~~~~~~

吹脹西九(roadshow) 13_05_2013

呢次係一篇---騎劫系列

家陣香港最熱嘅話題一定係海旁隻吹氣大鴨! 

講真, 未有消息話佢會黎香港之前, 好早已經喺網上見識過佢嘅可愛. 當知道佢會游到黎香港, 其實都開心, 仲好想搵個方法好好去迎接佢嘅光臨. 

好可惜, 佢離我哋太遠太遠勒, 中間仲有一大堆人同一個海嘅阻隔……我真係好想親近下隻鴨呀!!!!

好啦, 既然埋唔到佢身, 我哋就先去探佢嘅對手!!!

位於西九嘅一個充氣世界 ((M+進行:充氣)), 一個撓口摻手嘅活動名.

係呀! 竟然俾我地撞正天晴氣朗嘅幾個鐘!

入場前都知有幾件展品因為天氣或者其他問題有待復修, 所以我哋一定唔會玩得晒全部嘅野, 而喺我哋玩到嘅幾件玩具入面呢….有一個真係無敵威咁好玩!! 

叫做佔據聖地

講佢之前, 都一齊睇下我哋點同另外幾個展品玩吧.

認真, 門口呢幾舊石, 係幾好影 !!

如果你個名有個輝字, 可以參考下佢.

呢舊有好大回響嘅作品.

拉屎

你問我對佢有乜評價? 

大舊!  好大舊!

唔記得左係邊個諗出黎嘅概念

咁樣玩自己, 真係無鬼為.

入場前, 以為佢會係最好玩~

落差太大勒, 原來無想像咁大件, 有點兒sit氣, 無乜心機影了.

跟住就係全日最好玩嘅呢個場景!!!

絕對值得排隊入場.

我唔用文字話你知有幾好玩, 用片答你.

超high !!

睇番條片都笑到我出晒汗!!!!

俾多張招牌跳相你望下.

點解唔用個維港做背境呢, 蠢左...

呢個名為佔據聖地嘅玩具真係不得之了, 睇片你已經會感覺到置身喺裡面嘅時候可以有幾開心. 得10分鐘時間, 係完全唔夠玩. 

講真, 我哋完全無理過呢舊玩具背後個創作意念, 只知道喺入面跑跳碰嘅時候, 帶到俾我哋無比歡樂. 膚淺都係咁話架勒, 我哋眼中好嘅藝術品定義係好簡單, 影相幾得意, 又有得玩就已經好夠, 絕對可以不帶任何深層意義.

總結, 西九呢個活動係值得去行一轉嘅, 但最好係揀番閒日嘅時間, 唔使咁多人迫晒喺同一玩具等影相.  (ok, 我知道呀媽係女人.)

呃呃like(roadshow) 03_05_2013

偶然上網遊走嘅時候, 見到一篇文章教人點樣喺Facebook…….呃like.

用得 呃 呢個字, 好明顯就一定係篇抽水文啦, 話就話教你, 同時亦都笑鬼你, 內容好鬼過癮. 但老實講句, 我真心認為 (為何人們喜歡在facebook 呃like) 可以出一篇論文.

入題!

呃like, 人人都明, 咁咩叫呃呃like?

呃呃like 其實係一個遊戲, 一個可以俾你同朋友喺日常生活期間, 增進感情嘅互動遊戲!! 我要正式喺到向大家強烈推薦.


遊戲步驟好簡單:
1.      趁你朋友不知不覺嘅時候, 將佢嘅電話暫時移離視線.
2.      用電話幫佢update facebook status, 如情況許可, 請搭番張頂癮照片
3.      如情況依然許可, 幫佢like自己個 status
4.      如情況都仲許可, 幫佢回覆朋友嘅留言
5.      如情況咁都仲依然許可, 都唔好玩勒, 你朋友已受到應有教訓, 搵機會不動聲色咁放番個電話去佢身邊. 如果可以做到呢一步, 呢次已經係一個perfect hit.


扯! 未即係玩人facebook~~~   講咁多, 有乜野好玩?


當你身邊位朋友, 可以為你創作類似句子時, 事情會唔會變得更得意?

(status::我性陳，我身痕，我鐘意女人喉禽)

like係唔使呃嘅, 佢會好自然咁湧埋黎



呢個遊戲, 我已經唔記得左係點樣開始, 但好肯定呢種騎劫別人facebook嘅做法, 最初都大約係講吓類似嘅說話.

(status::我是on 99的人)

慢慢, 大家會因應機主嘅際遇去設計status…好貼心

(status::2013年啦！我要拍拖呀！我真係仲未忘記...好辛苦呀...)

剛失戀既人

(status::如果我有頭髮，我一定溝死女！)

Skin head 嘅單身男人




最後, player之間嘅創意真係令人好無言

完全亂黎



呢種橫衝直撞嘅status令到玩人facebook都變得不再簡單乏味, 而呢個亦係點解我要
推薦大家試下玩呃呃like!! 因為我哋呢到專門為你介紹任何開心嘅事情~~


自從呢個活動喺我地player之間嘅圈子興起之後, 呢件事所帶動嘅歡樂, 估唔到並唔止於我哋幾個人, 就連平時比較少聯絡嘅facebook朋友一樣會投入左件事入面. 喺開始嘅時候, 可能只係身邊較密切嘅朋友會留意到並留言搭兩句嗲, 但當呢類戰鬥去到百熱化嘅時候...

(status::我很醜，但很持久)

有朋友會inbox問你, 真係想拍拖? 係咪要介紹女仔俾你識呀?
有朋友會係status回, 無用! 又輸! 你又俾人拎左個電話勒!!





喺現實世界, 更加有朋友會直接問你戰友, 佢呢陣子無事丫嘛? 我見佢嘅facebook status咁怪嘅~


不其然間, facebook入面部份似有還無嘅朋友, 因突然間嘅交流, 令關係都變得實在左!! 真係不得了~~


再者, 因為呢個遊戲係全天候進行, 無特定嘅開始時間, 只有終結時間(無電), 果種一個眼神就大家明白發生緊乜事嘅交流, 真係叫人讚嘆.....你望一望張枱, 我就識係枱底接收個電話; 你努力update緊相片時, 佢自動走去同物主搵水吹, 拖延時間. 即使行動失敗, 都夠大家開懷大笑一番, 每個片段都係令相處過程變得更熱鬧嘅原因.


聽我講完, 有無個好心急想玩嘅衝動? 有目標未? 如果你已經諗到幾位幸運兒, 恭喜你! 你身邊仲有佢哋, 佢哋一定係你身邊最close, 最玩得嘅朋友~~

(status::只要有愛，夢可成真。我信，你地信唔信呀？)

最後, 我想講句...Facebook like呢樣野真係個好鬼異嘅發明, 即使果個係被騎劫status, 我一樣會check住個 like….激氣, 真係爭唔落(大力拍枱)!!!


PS 為令遊戲公平, 兩大原則要守.
1. 不能用密碼lock機, 就算要lock, 都要係一個公開密碼.
2. 被騎之Status 不能刪除.


各位, enjoy~

毒有之Boys Love PROJECT: 即LOVE即有 (road show) 26_04_13

上一篇網誌入面講左少少sobplayer點解咁鐘意玩嘅原因, 仲提到參加比賽就係我哋嘅專長. 其實我哋口中嘅玩又點止參加比賽咁簡單丫, 仲係絕對多元化同生活化! 慢慢, 我哋會喺到一一呈上!! 

呢次, 我哋要將自家製既玩味帶入旺角西洋菜南街行人專用區

留意熱奶手上個LOVE字樣, 見唔見特別之處?

 對比下面.

佢手上個O字係斜左去另一個方向架!! 

今次咁做其實係有喻意嘅, 因為將會出現係Project嘅Love, 並唔係一般嘅Love, 係我地之間毒有嘅Boys Love

Project: 即LOVE即有

講咁耐即係玩乜呢? 大家都知西洋菜南街自從有左行人專用區時段後, 喺呢10年入面不斷咁轉變.

易拉架 街霸 百佬匯 o靚模 相佬 政治show 法輪功 仲有一架--警車

如果問呢陣子最hit係乜, 除左內地黎果批奇人異士之外, 最紅一定係擺檔幫人影即影即有呢件事.

我並無深入去探究呢個風潮從何而來, 整個概念背後個特別意義, 只係有日行過, 嚇見條街原來已經有4檔同時做緊!! 成條行人專用區, 7仔加埋OK都好似無4間, 呢件事真係好有話題性, 忽發奇想, 不如幫同佢地黎個小比拼吧~~

要做比較, 首先緊係喺每個攤檔都影番張啦, 但我地呢次個著眼點除左張相靚唔靚外, 都想睇下攝影師個創作力同埋佢跟客人之間個互動可以去到邊(簡單講, Is he 吹able & 玩able?). 正如我哋玩比賽一樣, 除左獎品外, 件事係未夠得意, 玩嘅過程, 最後領獎方法同待遇我地都會在意, 下下只係睇結果, 一定傷心死,

講番呢次點玩法. 係每個攤檔, 我哋都會講番類似下面嘅說話:

攝影師, 我地攪緊個project, 關於Boys Love嘅, 想你幫我地影出呢種感覺. 眼前呢兩位就係你嘅model, 可以隨便舞佢地, 幫佢哋擺post架~~  

聽完後, 幾位攝影師都對Boys Love呢樣野好有疑問, 哈! 我地再解說:

其實呢, 我地所講個Boys Love唔等於gay嘅, 無性愛係入面. 呢種Boys Love係….好比兄弟咁親, 又唔只老友咁簡單, 中間係有互相欣賞同支持, 甚至有一種超越友誼嘅傾慕同情懷喺裡面.

一段咁虛無嘅解說, 跟躆我哋經驗, 係絕對足夠引起任何人想吹水嘅意興(如果佢喜歡的話). 攝影師喺期間俾出黎嘅反應, 某程度上都睇到佢係未鐘意同客人溝通吹水. 而整個介紹入面我哋係無講呢個即LOVE即有嘅project, 因為我哋希望佢會保持番平常心, 當我哋普通客人去對待.

好, 入題勒!!!! 

講明先呀, 呢次話就話係比拼, 但我地純粹玩下炸, 各攝影師嘅一眾支持者唔好太認真.

即LOVE即有

日期21.04.2013

時間 15: 30  

每檔一張即影即有, 都係消費廿蚊

下面係按時序排列

1. instant20
Player: 軟人 小白

排隊時間: >30min人龍有時會似大時大節排隊買戲飛咁長

外表上面呢位攝影師係最有藝術家感覺嘅一位, 年紀應該同我哋差唔多掛, 笑容充足! 傾落, 發覺佢都好隨和, 好人黎嘅.

過程入面, 印象最深刻係佢講左句大約意思話張相影唔影到個Boys Love嘅效果, 係睇個model俾唔俾到種感覺....又真係好有道理.
當然, 佢跟住都有俾個動作概念我哋, 幫我哋完成左張作品.

有一樣客觀事實可以特別讚番instant20, 就係佢哋入住張相個框框.

睇得出係擺左心機, 完全跑出.

2. Monocam

Player: 傻輝 黎生

排隊時間: ~10min

呢位攝影師感覺比較沉實, 但並唔代表佢唔肯講野.

反而, 佢個指導性都好強. 喺指引傻生擺post嘅時候, 好肯俾意見, 甚至自己示範埋出黎, 都係一個玩得嘅人.

攝影師覺得黎生伸脷係一個selling point.....我真係諗唔通~

不過有樣野佢哋真係比下去....

只係用一個膠袋入住張相俾客

3. MEMO photo
Player: 小白 黎生

排隊時間: ~2min
最嫰口嘅靚仔攝影師, 似係仲讀緊中學嘅學生. 佢喺聽完我哋個Boys Love簡介之後, 甚至流露出一絲尷尬嘅表情, 好好笑, 而且得意~ 但亦因為咁, 靚仔過player既任何男士, 我唔打算俾佢個樣出現喺blog.

個Love牌擋住左一個好精境嘅地方, 個靚仔攝影師係叫我地 '橋' 腳架!! 哈哈

佢都有個相框俾客人入住張相

其實係可以印多少少資料/得意野嘅

離開時, 攤檔嘅朋友亦會好開心咁叫我哋上番facebook page支持, 感覺好青春同校園
仲有, 佢哋係我眼見唯一寫住有彩色相紙選擇嘅一檔(有錯勿插), 同埋每日頭5位(唔confirm個數字)影相嘅朋友會有紀念品送, 好有做project feel~




4. Quarter photo
Player: 奶 星

排隊時間: 剛開檔, 唔使排.
年紀最大, 感覺最成熟嘅一位攝影師.

一聽完我哋個Boys Love簡介之後, 行兩步, r左幾下頭.......就好似有個燈泡出現咁, 佢提意呢個動作...

好old school, 但襯佢 !
老實講, 我哋開頭都唔明佢指係邊個動作, 但當清楚後, 攝影師都唔使點指引, 我哋就自動波將星同奶玩個不亦樂乎, 因為呢個POST要兩個男人擺, 好好笑

見唔到奶個樣, 好可惜

呢個係入住相個膠袋

多條膠紙, 叫做贏左Monocam少少少

可能係件事太好笑, 或者剛剛開檔嘅關係, 呢位攝影師撻左一下q, 所以呢張作品其實係唯一一張要take two嘅, 佢好似話個曝光仲差少少. 當然, 佢係自己主動要求再影, 所以只係收左一次廿蚊~

前後玩左個零鐘, 4位攝影師, 各有唔同感覺, 都幾好玩. 

講真, 要做比較的話, 仲可以有好多範疇, 好似助手, 相紙, 器材, 燈光, 背景等等.....

始終我哋口中嘅比較都係玩票性質, 如果大家有留意, 我哋對一眾攝影師都無乜做任何批評, 佢哋都係付出緊自己心機時間去做喜歡嘅事, 應該係得到鼓勵. 至於張相係未合心水, 留俾大家分析. 反而想講係喺每次影相過程入面, 一眾攝影師都願意去聽我地所講嘅概念去俾意見, 無黑面, 交流都係做到嘅, 只係多與少嘅分別. 呢個互相溝通嘅過程, 我覺得隨時係取決張相影得好唔好嘅關鍵, 可能比部相機型號更重要.

影相, 本身就係一件開心嘅事, 黑白即影即有, 我覺得係更加令每張相都多一種故事性, 呢樣野正正係點解我會認為即影即有比衣家尖東海旁嘅即print即有, 又或以前嘅貼紙相機更講求感覺. 最終, 旺角行人專用區呢個攝影服務, 會唔會淪為另一個尖東海旁, 我覺得除左要睇攝影師嘅態度之外, 每一個影相嘅你點睇呢件事都好緊要.

廿蚊係一個價錢, 張相係一個價值, 絕對唔係張張都((到數))的.

話又說回來, 我哋之間嘅Boys Love並唔係咁易補捉. 咁多年來, 唔同project之間影過無數咁多相, 下面呢張一定係最有feel 嘅!!

非你兩個莫屬, 星軟人(攝於2011年聖誕冰場, 星軟塵)

最後, 如果讀者有興趣的話, 歡迎黎到我哋個專頁睇下呢4張Boys Love嘅受歡迎程度, 又或者自己都投吓票, 亦得! 話你知, 文章見街呢日, instant20暫時領先~~