講番點解會有呢壇野嘅出現~
其實D相同短片係黎自一個訪問, 雜誌毛幫我哋做嘅.
估下係乜丫~~
今日(15/08)已經出左街, 有興趣就整番本啦, 毛本身都好睇, d編輯又有慧眼, 買!!
早係安排呢個訪問之前, 心裡面都已經打算玩呢個star blog惡攪.
Star blog----真係唔應該無我哋份. 適逢毛又搵我哋做訪問, 就一於借個機會, 自己影d花絮, 剪剪貼貼, 攪掂.
喺呢到都多謝兩位小編同兩位攝影師吧! 加油, 你哋得架(仲未畢業嘅你哋, 好青春呀~~), 篇報導有爆點, 好好呀!!
另外都講聲唔好意思啦, 騎劫左你哋個訪問.
既然講起訪問, 就研究下我點睇訪問呢件事呢(四句, 有三個訪問, 訪問夠未?)~~
成個香港咁多傳媒, 久唔久都會見做呢行嘅朋友好努力喺facebook問/搵故仔去報導..
當然, 香港雖然地方細細, 都會有好多得意野發生, 而我哋都算係其中一個單位啦, 幾年間大大小小嘅傳媒都叫做觸及過下. 但我想話, 衣家遇到訪問邀請嘅時候, 心情同開始果陣已經有幾大分別. 因為兩三次嘅訪問之後, 我哋發覺內容好似總係離唔開下面呢d:
我哋點解/點樣開始,
有乜目標,
點睇香港,
點叫好玩,
有乜難忘…等等
真係有少少公式左呢, 而且好多野….blog都寫左的~
拿拿拿, 先唔好話我囂張住, 我哋仲係好welcome俾人(女性優先)訪問, 除左因為可以識多個朋友, 同多d人傾計外, 又可以見報(sob除左愛玩, 可能更愛出風頭), 何樂而不為呢~
以前, 即使人唔到, 相都要參與去個訪問入面
認真講句. 所謂嘅訪問對我哋黎講只係----有野玩, 一次玩樂嘅機會.
由始至終我哋都無諗過要借報導/訪問去宣傳自己的什麼什麼, 又彧者帶出咩野警世信息, 都係當玩only. 所以曾幾何時, 我哋係諗過可唔可以喺全統嘅訪問入面, 搵個突破位. 例如:
--搵一個同我哋素未謀面嘅網友一齊去, 搵佢代答
--叫軟人做小熙, 傻輝做湯麵, 小白做肥聲, 熱奶做大哥, 自己玩自己
--叫記者答, 我哋邊個最靚仔, 點解, 詳述之, 解到我o岩聽先準停
--叫記者自己報導番雜誌鮮為人知嘅一面俾我哋聽(即係….同我哋吹水)
其他老正嘅問題, 係blog入面搵就攪掂啦~~
所以呢, 我哋並唔係覺得訪問無聊/無價值, 而係想個訪問黎得比較特別, 有其他得意野可以發生, 而呢次毛嘅騎劫, 的確算係一個幾成功嘅突破, 哈!
話說回來, 訪問入面, 有一類問題我自己係好鬼驚, 關於’’點解你哋咁鐘意香港?’’ 或者 ‘‘點解要拎住支區旗去旅行?’’
唔係話介意去答呢類問題, 但好怕講完之後, 報導入面就會無端端多左個好愛香港嘅光環喺入面……我哋都係鐘意講玩多d~~
沒有留言:
發佈留言